F  r  a  n  c  i  s  c  i        M  a  u  r  o  l  y  c  i        O  p  e  r  a        M  a  t  h  e  m  a  t  i  c  a
Introduzione Help Pianta Sommario
Sphaericorum libri duo Liber primus Praefatio
|- App. -> |- = ->

[S:45v]MAUROLYCI SICULI SPHAERICORUM LIBER PRIMUS

PRAEFATIO

1 Post Theodosium qui sphaerica elementa tribus libellis complexus est, Menelaus reliqua sphaericorum totidem libris prosecutus, multa de sinuum proportione in tertio acutissime demonstravit. Inde sumpsisse videtur Ptolemaeus ea, quae in principio Magnae constructionis, post chordarum doctrinam de sphaericis tradidit, quae cum postea Tebitius legisset perspicacissimus, animadvertit eadem et meliori ordine et facilius ostendi potuisse. Quem admodum in libello apparet, in quo ipso Ptolemaeum carpit. 2 Adiecit his nonnulla Geber, qui novem libros in Magnam Ptolemaei constructionem conscripsit. Unde multa sumpserunt Georgius Peurbachius1 et Ioannes Regiomontanus dum praedictum ptolemaicum opus in Epitomen ordinatissime redigunt. Tradidit et complura super his Ioannes praedictus in libellis Triangulorum non spernenda. 3 Quae omnia cum ego proximis his annis vidissem ac contulissem non passus sum praecepta tanti momenti et Astronomiae, post planorum triangulorum scientiam, apprime necessaria sparsim legi. Ea itaque in hos duos libellos congessi adiiciens de ingenii mei rivulo demonstrationes nonnullas. 4 Sic tamen, ut post Elementa Theodosii ac Menelai demonstrata, detur his locus, ut haec sint illorum quasi Paralipomena. 5 Unde possint absolvi quaestiones, quae circa sphaeralia triangula fieri solent, quaecumque ad Primi mobilis circulos in Astronomia pertinent. Igitur expositis diffinitionibus, quasi negocii fundamentis, veniemus ad demonstrationes et a facilioribus exorsi ordinem quam commodissimum servabimus.

Inizio della pagina
->