Ex Septimo

111 Stellae fixae universae invariatam inter se servant distantiam. Stellae fixae secundum successionem signorum, ac tardissimo feruntur motu. Centenis annis per unum gradum. Motus stellarum fixarum super axe, polisque zodiaci fit. Quando quidem latitudines invariatas ***⁴³ 112 Hoc idem per declinationum mutationes observatoribus constitit. Haec omnia per observationes Arsatilis, qui et Aristillus⁴⁴, Timocharis, Abrachis qui et Hipparchi, vetustissimorum astronomorum, et demum ipsius Ptolemaei constitere. 113 Adhuc ex testimonio eiusdem Timocharis, qui [A:36r] stellas observavit Alexandriae. Item Agriae, sive Agrippae⁴⁵, qui Bithinia, ac Milei, sive Menelai⁴⁶, qui Romae considerabat qui affirmantur stellae fixae coeteris annis singulos peragere gradus, totumque ambitum 36 millibus annorum. 114 Post hos Albategnius, qui Aractae philosophabatur expertus est stellas in 66 annis moveri per unum gradum. Quidam antiquorum dicebant octavae sphaerae motum versus orientem moveri per octo gradus, deinde tantundem versus occidentem et sic alternis, uni gradui 80 annos dantes. 115 Nonnulli, quoniam maximam zodiaci declinationem et anni quantitatem variari comperiebant, ideo trepidationis motum opinabantur. Tebitius autem primus hunc motum, quem accessus et recessus appellat, commentus est. 116 Alfonsus autem Rex et longitudinis et trepidationis motu stellas moveri voluit: cuius calculum astronomi communiter hodie sequuntur. Sed contra horum commenta Joannes a Regiomonte multis agit argumentis. Tamen Peurbachius in tabulis eclipsium, et Blanchinus sequuntur Alfonsum. 117 Stellarum longitudines ac latitudines captantur instrumento per visum Lunae locum rectificato. Sicut in Quinto dictum est. Trium stellarum distantiis cognitis, si earum duae nota in longitudine et latitudine loca sortiantur reliquae longitudo cum latitudine nortescet. 118 Id autem fiet per scientiam triangulorum sphaeralium. Unde sequitur, ut si universae stellae notas inter se⁴⁷ distantias habuerint: duarum vero tantum loca in longitudine et latitudine constiterint omnium reliquarum longitudines ac latitudines cognitae venient. Haec⁴⁸ quo ad motum stellarum hactenus perspecta. 119 Cuius tarditas causa⁴⁹ [A:36v] est ut non nisi per multa secula satis cognosci possit. Verum memoria priscarum observationum vetustate abolebitur prius, quam ad posteros perveniat. Sed neque posteri iacturam hanc curabunt, neque assis unius quidem coelestia facient. 120 Et nos frustra curiositate conflictamur, et margaritas proiicimus. Satis tamen nobis facimus. Nunc ad describendum stellarum orbem properemus.